تاقبله می شین مردمه من قبله نمایم

تاقبله می شین مردمه من قبله نمایم

سودای چپ و راسته نانم فکرشومایم

فکرشومایم یا شیمی فکرم چیه توفیر

چارچشمی نهی مته به خشخاش که خدایم

توخوبه بیشی اردکه پس دیهات بازار

من دیهاتانه دلواپسه سایه جی گایم

اه خاک نبره نرمی می کله شقی حقه

فواره مانستان هانره سربه هوایم

بی خود مره شاخ شانه کشید شنگول و منگول

هرچی ایسم اگر ده شیمره بز بزهایم

جول جول مرا خوردن نوا دشمن به کمینه

ترسم بمانم تی دیل سر سرده پلایم

گیرم که می شاخانه جیری برمه شیر

بره مانمه تا که شیمی گله سیوایم

وقتی تی سره سایه بده اجنبی دامان

صدتاکلاه می سربمانه بازبی کلایم

می خاکه جه نرمی شاکودن خورشیده سرمه

می مذهبه جا کفره بگم تی خاکه پایم

رسوای جی می گیله اوخان تامتو مازه شهر

وقتی جه هوا غم واره من خنده صدایم

می دیل خوایه هیشکا نید ینم سربه گریبان

خلق هتو قلقا زنه می مرگه رضایم

قبرستان حلواره می عمامه نیه سبز

اه آیه به او آیه شهیدانه صلایم

شیون راه دکف می رفیقه راه تانی بوستن

تاقبله می شین مردمه من قبله نمایم

شعراز شیون فومنی